ТМК ОУ «Усть – Портовская средняя школа – интернат»       

                                     Сочинение ученика 8 класса     

                                                        Ядне Тимофея    

                                   Учитель: Комарова Валентина Накочевна

                                                     п Усть – Пор

                                                              2017                 

                                                       «Нисяни′  тынзя»

      Мань мяни тер″ вымна′ мюсерӈа″. Сидна″ нерня минрена нисява"  ӈэнив″. Я′ тиӈгэвна ӈэдалерӈа, хане, по′ тахана тыда″ вадаби, пилибт″ нюткуйда. Тэхэна манзарана ненэць тэри″  тарця ненэць вуни″ нга″. Пыда иланда′ тэхэд′ пере. Нисями тыта″ ня ӈопой иӈудм′ неда. Нисяни′ хан′ си ты″ ервандо′ саӈом′ хамедамбидо′, ервандо′  ӈудам′ теневадо′. Нисями ӈопой террихина  ты"  маламба  пиръяда. Ӈока″я ты″ нисяни терм′ ӈани″ хамедамбидо′. Нисями ты″ маламба терыпата хынотарха ӈэсеты. Теранда′ мун″  ян′ ӈэляри  ӈэсеты, ханяӈэхэна лэмор″ мунлаха ӈэнгу, ханянгэхэна  ӈацекы яртарха ӈэнгу.   Тэхэна′ манзарана ненэць мирвада″ таня″: тубкада, харда, яӈгацянда, тынзянда, ханда. Нисями манзеты: «Ты′ пэртя хасава ханда′ мятанда мэтада.»  Хасава мирв тэри моепада"  ни ӈа", ненэцяндрев нята", сюрпада", силпада". Мирвсяда хасава ябда яӈгу, илебцям′  тэва нида пират, нохом′ ни хадаӈгу, хоркым′ ни нямаӈгу.

    Нисяни чет тынзяда: ӈоб″ тынзяда ну′ ялэ тебта яркола  мэтада. Тикы тынзяда ӈуданда вэталама,  сян хибяхарт мэць нида пирас.

    Нябимдей тынзяда хананта мюня ядэланада. Тикы тынзям′  хибяри  мэць пирӈада мяд′ терхат″. Хан′ хуркоӈэ лакр  хэбта  ӈобтикы сава. Я′ поӈгана хан′ тахараб  мальвы ханзадм′ сярыба  мэцьтыдо′  хурко′  иня юӈгов. Пилибт ӈуда′ ӈылна ӈэда тынзя. Ӈацекы  ты″ яркыба мэць пирӈада хан′ мюня ӈэда тынзяӈгана.

    Няхаромдэй тынзянда хэхэдана ты″ яркыба мэтада. Тикы тынзянда вата ненэць нямарпада ни ӈа″. Мэсомахаданда нисями тынзямда халя′ юркана масарцетыда, ханзо ян′ сюрцетыда. Тад нямаб тикы тынзя ӈудам′ салмыбадараха ӈэсеты, ӈули″ нюлак, пенд′ мюня  нензарӈа.

     Ӈани″  ӈоб тынзянда сабе мэтада ни ӈа″. Тад хубта ян′ ӈэдалерпананда нянанда ханасетыда. Тарем манэлабтамбида, мел ненэць ӈэвамда янда тер″ теневабто′ сава.

  Тынзида″ нисями харета паӈгалпида. Тынзям′ пангалма нензел сер ни″ ӈа″. Нерде нисями ты″ помна харта ӈэсонда ядэласеты. Ӈани″ яля то, ӈани ядэрнга. Тарем ядэлабта хонрамба  вэва. Тасламбада серта вэнолаӈгу. Тарем ядерць нисями ты хорам′ тасламби, хобада тынзяӈэ ханта. Хорам′ сыхыдаӈгуда, хобамда тырабтаӈгуда, таддикад тикы тырабэй хоба вандако′ мюмня юсекурта. Тарем нердена талбэйда тасюмдамби. Талбэйда тасюмдамад сада′ мю мыӈгуда. Тадикадл тареда ната, тырабтаӈгуда. Тырамахаданда ӈани талбэй тасюмдабаӈгу: мэта хан′ мюмня моепаӈгуда, тантада, натада, ӈани″ тырабтӈгуда, халя′ юркана пюбартада……. Хадрю, тынзям′ пангалма нензел ни″ нга″.

     Нисяни′  тынзя″  яхана′ юседамадо′ юнгу. Яхана юседана тынзям′ манэпата нисями манзеты: «Тюку тынзя′ ерв ты″ пэраць нивэда пирас». Ӈэ″  нгылна  хуркари″  табор″, вэвако ӈамгэри″ юседа″, тикыд″ ӈабтадо′ таня″. Ты волтамбида вэвако ӈабт, ӈадьбята тынзя сэв′  ед юседабта вэва.  Мяканани тынзя илена нгамгэраха, ты′  пэртя ӈуда′  пеля. 

            Мань тедари  ӈопой тынзями. Тикы тынзями нисяни′ тынзяӈгад хэм. Ӈарка ненэцяӈэ хэмяданани тынзями нисяни тотрев чет ӈэӈгу. Тынзя выӈгана тарана ӈамгэ. Тынзямда ета хасава ни′  инямда ян′  моӈгуда.